Pintura ao óleo sobre lenzo que representa unha Virxe co Neno baixo a advocación de Nosa Señora do Pobo. O obra, de autor anónimo, amosa un modelo iconográfico derivado do coñecido icono bizantino custodiado en Santa María a Maior de Roma: «Salus Populi Romani».
A imaxe presenta a María como unha muller nova, con túnica rosada e manto azul con detalles dourados. A Virxe sostén ao seu fillo no colo mentres sinala con tres dedos da súa man dereita. De igual modo, Xesús, caracterizado coma un Neno de presenza mais adulta, aparece portando o Libro e en actitude de bendecir, sinalando novamente coa tradicional fórmula de tres dedos.
En canto á composición, a figura monumental de María vese subliñada por unha modulación de luz sabiamente introducida polo artista. Así, a escuridade da parte baixa contrasta co rompemento de gloria da parte superior, o cal ilumina a cabeza nimbada da Nai de Deus. Polo demais, distintas cabezas de querubíns emerxen de entre as nubes completando a imaxe.
- Chamoso Lamas, M. y Casamar, M. (1980). Museo de Arte Sacro Clarisas de Monforte. Madrid: Caja de Ahorros de Galicia.
- Sáez González, M. (2018). Coleccionismo y almoneda del gran Conde de Lemos, Don Pedro Fernández de Castro. Lugo: Diputación de Lugo.